علاء الشيخ: المواطن المصري

كل الناس دلوقتي بقت بتقول خطابات تحفيزية وكلام تشجيعي كتير،شايف إنك مختلف عنهم إزاي؟

أنا عامةً من الناس اللي ابتدت تزهق من النوع ده من الخطابات. هي صحيح بتدّي فكرة إزاي تقدر تتعامل مع مختلف أمور الحياة، بس شايف إن الأفضل إن الإنسان يخوض التجربة بنفسه أو يمر بالموقف نفسه عشان يعرف حقيقته وإزاي فعلًا يقدر يتعامل معاه على أرض الواقع.
فالكلام مهما كان حلو، أكيد بيبقى مختلف عن واقع اتعاش. حتى الشخص اللي بيعمل الخطابات التحفيزية دي ممكن يكون بيتكلم عن تجربة شخصية، هو مر بيها في حياته. واحنا كلنا كل واحد فينا عنده تجارب مختلفة عن التاني.مش كلنا مثلا اتربينا في نفس البيت أو دخلنا نفس المدرسة. شايف إنه في حاجات تنفع لناس لكن ماتنفعش لناس تانية. الواحد المفروض ياخد الكلام العام ويحاول يطبقه بما يتماشى مع حياته هو لأن كل واحد فينا مختلف عن التاني. يعني أنا مثلًا عملت حاجة اسمها “المواطن المصري” وعملت كوميديا بس لو كنت رحت لعبت كورة مثلاً، أكيد كنت هفشل. كل واحد بيبقى ليه تركيبة معينة لايقة عليه هو شخصيًا.

بعد ما دخلت الجامعة واشتغلت في مجال مختلف عن مجال دراستك،ندمت على الخمس سنين اللي قضيتهم في كلية هندسة؟

لأ خالص. لأن كلية هندسة صحيح ماستفدتش منها كمجال شغل لكن استفدت منها كطريقة تفكير. هي الدراسة في هندسة أصلاً مش بس عشان تعلمك إزاي تطلع مهندس على قد ماهي بترتّب مخك وطريقة تفكيرك وتعلمك إزاي تفكر صح. فبالعكس لأ، مش ندمان خالص.
كنت شاطر في الكلية وجايب إمتياز واترتبت عالدفعة، ليه ماشتغلتش في مجال دراستك مهندس وفي نفس الوقت اشتغلت في مجال الكوميديا؟
هو أنا مش بشتغل في مجال الكوميديا طول الوقت، أنا أصلاً بشتغل في المجال الإبداعي وشغلي في الكوميديا ده بيبقى عمل جانبي. كمان أنا بعد مااتخرجت رحت اشتغلت في Unilever أربع شهور، بعد الأربع شهوردول اتأكدت تمامًا إني مش عايز اشتغل في المجال ده،مش عايز أكون الشخص اللي بيصحى يقعد عالكمبيوتر يشوف أرقام ويروّح، حسيت إني مش هابقى مميز، مش هاعرف أدي كل اللي عندي وهايبقى زيي زي مليون مهندس تاني، مش هافرق حاجة لأن أنا مش شاطر هنا. يعني آه هاعمل اللي علي في شغلي بس مش هاتميز.

ليه مجرّبتش من الأول تدرس حاجة تانية تكون مبسوط فيها أكتر لو انت مش حابب هندسة؟

كان فات الأوان على الخطوة دي، لأن أنا اكتشفت موهبتي أو اللي أنا عايز أعمله وأنا في سنة رابعة كلية، وكنت بالفعلابتديت أعمل فيديوهات وحاجات إبداعية وأخرِج حاجات، كان صعب إني أوقف كل ده وأرجع من الأول تاني أدخل كلية مختلفة.
وكمان أنا مقتنع إن مجال الكوميديا مش محتاج دراسة، أهم حاجة إن أنت تبقى عندك الموهبة وتسندها بالقراءة والفرجة على فيديوهات في المجال ده بحيث إن أنت تنمّي موهبتك.

في رأيك، ممكن حد يشتغل في الحاجة اللي هو درسها والحاجة اللي هو بيحبها مع بعض؟
ممكن طبعًا. يعني مثلاً مجال الكوميديا صعب الواحد يعتمد عليه كعمل دائم في مصر لأن فيه قيود سياسية ممكن تتحط في يوم وليلة تخليك تقعد في البيت. مثلًا باسم يوسف: كان مكسر الدنيا كإعلامي ساخر والبرنامج بتاعه كان محقق أكبر نسبة مشاهدة في تاريخ التليفزيون المصري! دي حقيقة فعلًا. لكن تغيير سياسي بسيط قعدّه في البيت بكل بساطة. الكوميديا في مصر مش مضمون الشغل فيها،عشان كدة بشتغل في المجال الإبداعي بشكل عام في حاجات تانية.
إيه أكتر حاجة استفدت منها ومبسوطإن أنت حققتها وبتشجعك تستمر فيالمجال ده؟
مبسوط إن أنا حققت ذاتي. مبسوط إن أنا لقيت حاجة أنا مميز فيها وشايف نفسي كل يوم بظهر فيها أكتر سواء على المسرح نفسه أو عال youtube. لأن أنا مكنتش عارف أنا عايز إيه أو مميز في إيه، ودي كانت حاجة ابتدت تسبّبلي إحباط إني أشوف ناس ناجحة كتير وأنا مش شايف نفسي زيهم. شغلي في مجال الكوميديا حققلي إشباع ذاتي وبقيت مبسوط جدًا إني اكتشفت الحاجة اللي أنا بحبها ومميز فيها وبدل ما ابقى زيي زي مليون مهندس، هابقى زيي زي 10 كوميديين، قللنا الرقم شوية.
شايف نفسك فين كمان 10 سنين؟
مش عارف فعلًا، ودي حاجة مخيفة بالنسبة لي. بس ببذل مجهود وبعمل اللي عليا وأنا يمكن من ضمن مشاكلي في حياتي إني عندي فشل رهيب في التخطيط. يعني مثال على كدة “المواطن المصري”، عملته لكن ماطلعتش بيه على التليفزيون. أنا عارف إن دي مشكلتي بس عادي يعني مش هفكر فيها كتير.
تحب تقول حاجة لمشاهدينك أو توجهلهم رسالة؟
أنا مش عايز ابقى تقليدي أو بقول نفس الكلام اللي كل الناس بتقوله بس فعلاً لو عندك موهبة أنت مؤمن بيها ،ولازم تبقى فعلاً مؤمن بيها وشايف نفسك فيها لأن في ناس كتيربتفتكر نفسها لذيذة وهي مش لذيذة، وفي ناس بتفتكر نفسها بتعرف تمثل وهي مبتعرفش تمثل. خليك صريح وواضح مع نفسك وأنت هاتعرف الحاجة اللي أنت مميز فيها. لو حسيت إنك موهوب في حاجة، اجري وراها، أوعى تسيبها.

 

Facebook: https://www.facebook.com/alaa.sheikh

Fan page: https://www.facebook.com/AlaasheikhVideos/

El Mowaten: https://www.facebook.com/almowatenelmasry/

Om Esraa: https://www.facebook.com/omesraaa2/

Youtube: https://www.youtube.com/channel/UCnobbVtUOsSvKR4YzOFprdg

Twitter: https://twitter.com/Alaaelsheikh

Instagram: https://www.instagram.com/alaaelsheikh/

Share the joy
  •  
  •  
  •  
  •  
  •  
  •  
  •  
  •  

Nada Shahin

Founder and CEO. Mother of the staff. Dentist. Teacher. A heart-driven spontaneous perfectionist (you do the maths). Passionate about writing. Loves chocolate of all colours and types (no discrimination).

You may also like...

Leave a Reply

Your email address will not be published. Required fields are marked *